Nga stërvitjet e para te garat brenda dhe jashtë Kosovës, na udhëheq i njëjti pasion: të rritemi së bashku përmes çiklizmit.
Na bashkon dëshira për t’u zhvilluar si sportistë dhe për t’i afruar më shumë njerëz me çiklizmin. Këto vlera na udhëheqin në stërvitje, në gara dhe në komunitet.
Përgatitemi me kujdes për garat në Kosovë dhe jashtë saj. Vlerësojmë përpjekjen, lojën e ndershme dhe përparimin e çdo çiklisti.
Duam që të rinjtë ta njohin çiklizmin në një mjedis mikpritës. Me udhëzimin e trajnerëve, zhvillojnë teknikën, besimin në vete dhe dashurinë për sportin. Planet e anëtarësisë i gjen në faqen e aplikimit.
Prishtina është shtëpia jonë. Përmes garave dhe aktiviteteve të klubit, duam ta bëjmë biçikletën pjesë më të natyrshme të jetës së qytetit.
Nga themelimi në vitin 2022, klubi është rritur përmes njerëzve, stërvitjeve dhe garave. Këto janë disa nga momentet që kanë formësuar historinë tonë.
Qëndrim Pllana, Albion Ymeri dhe Shqiponja Osmani Pllana themelojnë klubin në Prishtinë, duke e kthyer pasionin e përbashkët në një ekip.
Albion Ymeri fiton Cross Country Prishtina 2023 në Parkun e Gërmisë, duke shënuar një nga sukseset e para të ekipit.
Albion Ymeri fiton kampionatin kombëtar të triatlonit, një arritje që pasqyron përkushtimin e tij në disa disiplina sportive.
Klubi merr pjesë në Tour of Kosova 2023, krahas ekipeve profesionale nga 13 shtete.
Valon Binakaj i bashkohet ekipit. Më vonë, ai përzgjidhet për të përfaqësuar Kosovën në gara ndërkombëtare.
Klubi pranohet me të drejta të plota në Federatën e Çiklizmit të Kosovës, një hap i rëndësishëm në zhvillimin e tij.
Valon Binakaj përzgjidhet në Kombëtaren e Kosovës për Tour of Albania 2024 — pjesëmarrja e parë e një çiklisti të klubit në një garë ndërkombëtare me fanellën kombëtare.
Më 21–22 qershor, ekipi garon në Kampionatin e Kosovës në Bibaj dhe arrin rezultate në disa kategori.
Pjesëmarrje në Kupën e Anamoravës me 5 çiklistë në kategoritë Elite, U23 dhe Hobi.
Klubi nis sezonin me pjesëmarrjen në Trofeun 26 Marsi në Kavajë, në kalendarin e Federatës Shqiptare të Çiklizmit.
Në moshën 16-vjeçare, Festim Kurti fiton kronometrin individual në kategorinë Junior dhe regjistron kohën e tretë më të shpejtë të garës. Albion Ymeri merr argjend në kategorinë Elite dhe, të nesërmen, bronz në garën rrugore prej 157 km.
Në një konkurrencë me mbi 60 çiklistë nga rajoni, Albion Ymeri zë vendin e dytë në kategorinë Elite në Sharr Cup 2025 — një nga garat më sfiduese malore të rajonit.
Valon Binakaj dhe Betim Rexha përzgjidhen të dy në Kombëtaren e Kosovës për Tour of Kosova 2025 — gara ndërkombëtare 3-ditore kundër ekipeve evropiane.
Festim Kurti, çiklisti më i ri i klubit, triumfon në MTB Cross Country (42 km) në Shkodër në kushte të vështira atmosferike.
Më 2 nëntor, klubi organizon edicionin e parë të Kupës Prishtina 2025 — garë rrugore me kategoritë Elite/U23/Junior (134 km) dhe Kadet/Femra/Master/Hobi (40 km). Festim Kurti fiton në kategorinë Junior, ndërsa Valon Binakaj zë vendin e tretë në Elite.
Dy transferime në fund të sezonit: Sibora Kadriu, një nga çiklistet më të suksesshme në Kosovë, dhe Arbër Xhemajli nga Vushtrria.
Vazhdojmë stërvitjet, garat dhe punën me ekipin. Anëtarët dhe aktivitetet e përditësuara i gjen në faqet e ekipit dhe të kalendarit.
Njihu me njerëzit që kujdesen për klubin dhe e përfaqësojnë atë në gara: çiklistët, trajnerët, komisarët dhe bordi.

Na ndiq në Facebook për lajme, fotografi nga garat dhe njoftime për aktivitetet e ardhshme. Do të na bëhej qejfi të ishe pjesë e komunitetit tonë.